واقعة صادمة وقعات عشية اليوم الأحد 22 مارس، بطلَتها موظفة سابقة فالمديرية الجهوية للضرائب بمراكش ملقبة بالحاجة، لي ولات تعتبر نفسها أنها هي القانون وتفرض لي بغات…
تفاصيل القضية، أن المعنية قصدات مدير نشر جريدة “نيشان الآن” فواحد المقهى، وطالباتو وبصوت مرتفع يحيد فيديو منشور بالجريدة، فيه أحد زملائها وهو مسؤول بمراكش باين ناعس وسط اجتماع رسمي حاضر فيها ممثل جلالة الملك، ولكن الرد كان بالرفض.
ومن تما تبدلات الأجواء، حسب شهود، خرجات فيه المتهمة بالتهديدات وكلام قاصح، وزادت المعنية شدات فأسلوب التحدي، وكتقول بلي ما كاين حتى شي حد يقدر يوقفها، فمشهد توثق بكاميرا وقدام الناس.
هاد الشي خلا طاقم الجريدة يخرج ببلاغ شديد اللهجة، كيدين فيه هاد السلوك، وكيشدد أن الصحافة ماشي لعبة، وأن حرية التعبير خط أحمر ما يمكنش يتجاوز، ولا أحد له الحق يطالب صحفي بحذف شي مادة.
كما يطالبون وزير المالية والجهات المختصة بفتح تحقيق عاجل، باش يتحط حد لهاد التصرفات لي كتضر بصورة الإدارة العمومية.
وفخطوة تصعيدية، أكدت إدارة جريدة نيشان الآن أنها غادية تمشي للقضاء، باش تدافع على حقها وتوقف هاد الممارسات لي ما عندها حتى مبرر قانوني.
يتبع…