نيشان الآن
مراد العطشان
جيني نيشان، الكرموص ديال النصارى اللي هي الهندية فالحقيقة، ولات بحالها بحال لافوكا والاناناس : بـ20 درهم للوحدة. تقدر تشوفها فالسوق وتقول: “واش نأكلها، ولانشري نص كيلو دجاج” ولكن العجيب هو التعليق اللي كيترافق معاها: “كلتيها، يعذبك الله!” بحالها بحال شي خطيئة غذائية، وكأنها ذنب ديالك أنك تفكر تاكل الهندية!
فين المخطط الأخضر اللي كان كيهضر عليه؟ راه ماشي معقول أن الهندية اللي كانت كتنبث راسها، وكاتكبر بلا عناية، وتوزع بلا حساب، ولات اليوم بحال شي اكلة فاخر ةخاصك تستعد ليه ميزانية.
الهندية، اللي كانت فاكهة “الشعب”، اليوم ولات فاكهة “النخبة”. تاكل وحدة، وتخلص بحال اللي غادي تاكل فشي مطعم 5 نجوم. وهنا السؤال اللي كيبقى معلق: واش المخطط الأخضر كان كيخطط باش الهندية توصل لهاذ الثمن؟ ولا كان الهدف هو نشوفو الفلاح الصغير كيتفرج فالثمار اللي ولات بعيدة على جيبو؟
نيشان، الهندية راه ماشي غير فاكهة، راه رمز للصبر. ولكن حتى الصبر راه ما بقاش يصبر على هاذ الأثمان. وتجيك الهندية تتهددك بجملة “كلتيها يعذبك الله”، وكأنها تقول ليك: “آجي، خلص وعاقب نفسك في نفس الوقت!”
فين الدعم؟ فين اللي كانو كيهضرو على غرس الأرض ودعم الفلاح؟ واش الهندية خاصها تكون رمز الاستغناء، ولا رمز الاستغلال؟ المخطط الأخضر بدا بحال حلم، ولكن الحلم تقلب كابوس، وبقى المواطن يتفرج على كيفاش الفواكه اللي كنا كنستهلكوها بكل بساطة ولات من الرفاهيات.
نجيكوم نيشان، الهندية اللي بقات رمز للصبر والتحدي ولات اليوم شهادة على أن المخطط الأخضر خاصو إعادة صباغة، حيت الأخضر ما بقاش كيبان فيه. ونيشان جملة، “كلتيها يعذبك الله” راه ماشي تهديد، ولكن وصفة واقعية على واقع اللي كيخلص فيه المواطن “ذنب” أنه بغى ياكل الهندية.
نيشان الآن