نيشان الآن
دخلو عمال شركة “أوزون” للنظافة فقلعة السراغنة فإضراب اليوم الجمعة 7 فبراير الجاري، فالحي الصناعي، احتجاجاً على تأخر الأجور ديالهم، فواحد الأزمة لي ولات تتكرر كل مرة.
العمال كاعيين حيث رمضان على الأبواب وعندهم التزامات عائلية لي خاصهم يوفرو ليها المصاريف، ولكن الأجور ديالهم مازال ما شافوها.
المتضررين تجمعو قدام مستودع الشركة، كيحتجو وكيطالبو بحقوقهم، حيث هادشي وقع ليهم أكثر من مرة، وما بقاوش قادرين يتحملو التأخير ديال الخلاص، خصوصاً فهاد الفترة الحساسة.
المشكل ماشي جديد، حيث قبل شهور كانت احتجاجات فمدن أخرى ضد نفس الشركة بسبب نفس القضية، وكاي يعتبرو هادشي استهتار بحقوقهم، وكيطالبو المسؤولين يتدخلو باش يلقاو حل نهائي ليحمي حقوقهم ويضمن ليهم خدمة محترمة وأجر فالموعد.
واش غادي يكون تدخل من عامل الإقليم؟ ولا العمال غادي يبقاو معلقين فهاذ الأزمة كل مرة؟ والمدينة عادي تخناز بالزبل؟ المهم الأيام الجاية غادي تكشف المستور!
نيشان الآن