نيشان الآن
تفاجأو ساكنة المحاميد ومراكش كاملين بخبر تحويل “دار الجمعيات” لمقر باشوية المحاميد، رغم أن هاد الفضاء كان جزء من مشروع “قطب المواطن” فإطار برنامج الحاضرة المتجددة لمراكش، لي توقع قدام جلالة الملك محمد السادس فـ2014.
هاد القرار طرح بزاف ديال التساؤلات، خصوصا أن المشروع كان مبرمج باش يكون فضاء للجمعيات والمجتمع المدني، وكان من المفروض يتم تدشينو قبل 2017.
دابا، الجمعيات المحلية كتهدر على حقها فهاد الفضاء، وتطالب بتوضيحات من المجلس الجماعي، لي هو الشريك الرئيسي فالمشروع.
الغريب فالأمر أن رئيس مجلس مقاطعة المنارة ماكانش عارف أصلاً أن دار الجمعيات تحولات لمنطقة حضرية المحاميد! هادشي زاد من استغراب الساكنة وخلا الناس يتساءلو: شكون المسؤول على هاد التغيير؟ واش مشا فالاطار القانوني؟ علاش ماكانش تواصل مع المجتمع المدني؟
شوفوا كيف كانت وكيف ولات !!
الساكنة والجمعيات دابا كيطالبو بتوضيح رسمي من المجلس الجماعي والمسؤولين المحليين، حيت هاد الفضاء كان خاصو يبقى مفتوح لخدمة المجتمع المدني، وماشي يتحول لإدارة عمومية بلا حتى ما يتم التشاور مع الناس المعنيين.
واش غادي يكون رد رسمي من المسؤولين؟ ولا غادي يبقى الغموض سيد الموقف؟ الأيام الجاية غادي تكشف المستور!
نيشان الآن