نيشان الآن
عدد من المواطنين بمدينة الحسيمة كيتشكاو من غياب قائد المقاطعة الأولى على الإدارة، بحيث كيجيو لقضاء أغراضهم الإدارية وما كيلقاوش المسؤول فبلاصتو، وكيضطرو يستناو حتى الزوال باش يجي.
وحسب مصادر محلية، القائد معروف بترددو المستمر على المقاهي أكثر من المكتب ديالو، وهاد الشي كيزيد من معاناة الناس اللي عندهم وثائق وإجراءات مستعجلة.
الأمر ما وقفش هنا، بحيث كيتقال أن هاد المسؤول كان غير خليفة، وسبق للكاتب العام السابق دكوج أن أعفاه وحولو لقسم الشؤون العامة بالعمالة، ولكن ورغم هادشي رجع قائد بفضل علاقات عائلية، خصوصا أن عندو شقيق فوزارة الخارجية.
المواطنين كيتساءلو علاش السلطات المختصة ما كاتدخلش باش تراقب عمل المسؤولين وتعاقب اللي كيتهاونو فخدمة المواطنين.
كما كيتسناو المتضررون تدخل الجهات الوصية لوضع حد لهاد السلوك اللي كيزيد من تعقيد المساطر الإدارية.
نيشان الآن