جيني نيشان: نزار البركة مول حزب الميزان: أنا وزير نهار الإثنين… وضحية فالأحد، تايكل مع الذيب وتايبكي مع السارح!

نيشان الآن

مراد العطشان

السي نزار، الأمين العام ديال حزب الاستقلال لي فالحكومة، خرج لينا فواحد اللقاء، شدّ الميكرو، وتنهد بحزن، وقال:
“آ عباد الله، الغلاء قهر المغاربة، خاص اللحم يرخاص، خاص الدجاج ينقص، خاص المنتجين يكونو وطنيين، خاص الأسعار تكون مناسبة… خاص خاص وخاص!”
زعما السي نزار، انتَ كتهضر؟ ولا كتدير تقرير ديال شي ناشط حقوقي؟ ولا كتبتي شي تدوينة ونسيناو نقولو ليك “معاك يا أخي”؟
واش نتا الحكومة ولا المعارضة؟ شكون باغي يحل المشكل؟ وشكون تينوض الصباح يصوّت على الزيادات؟

تاتاكل مع الذيب… وتاتبكي مع السارح؟

السياسة ديال “أنا ماشي معاهم… ولكن راهم صحابي”
السي نزار ماشي غير كيهضر بحال معارض، ولكن كيهضر بحال شي مواطن ما عمره شاف فاتورة الماء والضو، ولا شاف شحال ولاّ اللحم بالحانوت!
الأسعار طالعة؟ آه السي نزار، حنا اللي زدناها؟
اللحوم غالية؟ واخا، شكون كيتّخذ القرارات فهاد البلاد؟
المغاربة مخنوقين؟ فين كنتي من 2021؟

الحكومة كاتشوف المواطن بحال لاشيء، ولكن نهار الانتخابات كاتقلب عليه بحال شي كنز مفقود!

اللحم ولا حلم… والدجاج هرب من القفص
السي نزار شدّ الميكرو، خنق صوتو شوية، باش تعطي الدموع التأثير المناسب، وقال:
“حنا كنقولو للمنتجين ديرو ربح معقول، وخليو المغاربة يشريو اللحم والدجاج… راه الأسعار بزاف!”

والمغاربة كيشوفو بعضياتهم بحال لي كيشوفو شي نكتة بلا نكتة!
علاش كاتصوّتو على القوانين لي كتخنق المواطن، ومن بعد كتقولو خاصنا حلول؟

الضو زاد، الما زاد، المعيشة ولّت بحال شي تحدي فـ “Survivor”… والمواطن خاصو يزيد الصبر!

الانتخابات جاية… السياسيين بداو البكا!
حنا المغاربة عارفين باللي فاش كيبدا السياسي يبكي معانا… راه الانتخابات ولات قريبة!
أزمة البطالة؟ تذكرتوها؟
الأسعار طالعين؟ هادي جديدة عليكم؟
المواطن مقهور؟ صافي دابا حسيتو بيه؟

السي نزار، راه المغاربة ماشي محتاجين وزير يبكي معاهم، راه محتاجين وزير يخدم!
يا إما تكون حكومة وتتحملو قراراتكم…ولا قدمو استقالاتكم ومرحبا بكم فالمعارضة الحقيقية! أما هاد السياسة ديال “أنا وزير نهار الإثنين… وضحية فالأحد” راها فيلم قديم، وتذاكر العرض سالاو!
حنا اللي خاصنا نبكيو… حيث تاتاكلو مع الذيب، وتاتبكيو مع السارح، ولكن مازال ما شفنا حتى حد تايقول: “أنا السبب”!

نيشان الآن 

شاهد أيضا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على هذا ، ولكن يمكنك إلغاء الاشتراك إذا كنت ترغب في ذلك. موافقالمزيد