جيني نيشان.. فـماكدونالدز طبيب وطبيبة خلاو الخدمة باش ياخدو بيغ تيستي والمرضى كيموتو فسبيطار محمد السادس!
نيشان الآن
مراد العطشان.. صحفي
السبت لّي داز، فالثالثة دالصباح، والناس ناعسين، شكون يقدر يتوقّع أن مراكش غتكون فوق صفيح ساخن؟ لا، ماشي بسبب الزلزال، ولكن بسباب أطباء شدّو الساحة ديال ماكدونالدز طريق كازا باش يديرو “الدوبل نيت” double night ديال الأعصاب!
شاب وشابة بلباس جراحي، شدّو الحلبة وسط الباركينغ، وبداو كيتبادلو الكلام الحار، حتى بداو الناس لي دايزين كيشوفو واش تصادم ولا بريكولاج عاطفي وسط نوبة ليلية. وفين؟ قدّام طوموبيل فيها شابة وشاب آخرين، حتى هوما لابسين البذلة ديال “مهنة الرحمة”. والطوموبيل اللي كانو جالسين فيها باقي الأطر، كتحمل فزجاجها الخلفي عبارة “à vendre”، وكأن حتى هي بغات تهرب من المسؤولية!
والمفاجأة؟ كاملين لابسين بدل طبية!
هادو باين عليهم خدامين فالمستعجلات، فالعناية المركزة، فالإنعاش، ولكن ها هوما كيتجادلو فباركينغ ديال ماكدو بحال اللي خارجين من سهرة، ماشي من شي مستشفى.
وسط الجدال، الشابة خرجات بتصريح واحنا عندنا التسجيل ديالو:
“إييه، حنا خدامين، وفاش تنخرجو تنخليو لي بلاصينا!”
وجات من وراها شابة أخرى فأجواء تضامنية، وقالت بصوت ثابت:
“خدمنا 24 ساعة، كان الضغط، ماتو الناس، وخرجنا نرتاحو فـماكدونالدز.”
فين؟ فمراكش، فمستشفى محمد السادس، لّي المواطنين فيه كيبكيو قدّام الباب باش يلقاو سرير ولا طبيب، واللي المستعجلات ديالو ولات كتشبه ساحة حرب بلا قيادة.
والسادة الأطباء – إلى فعلاً كانو أطباء – خلاو خدمتهم وخرجو بالبدل الرسمية. واش بتقارير؟ بإذن كتابي؟ بتعويض رسمي؟ باحترام لكرامة المهنة؟ الله أعلم.
وإلا تبين العكس، فهنا ماشي راحة قانونية… هادي راحة على حساب أرواح الناس.
الناس اللي شافو المنظر بداو كيتساءلو:
– واش هاد المناوبة فـالسبيطار ولا فـماكدو بليل؟
– واش فعلاً كاينة فرقة تعوّضهم؟
– واش مستشفى محمد السادس فيه تبديل بالشعور، ولا عندهم نظام تناوب رسمي؟
– واش واحد كيتوفى فالداخل، وواحد كيطلب “بيغ تايستي” فالخارج؟
-بغيتي ماكفلوري والا بيغ ماك طلب glovo ماشي تخلي بلاصتك وتخرج وتخون الأمانة
واش الأطباء فوق القانون؟
واش حياة الناس تقدر توقف حتى الطبيب يفكّ مشاكله فباركينغ ديال فاست فود؟
واش وزارة الصحة كتعرف شنو واقع؟
ولا كلشي كيتمسح فـ”الضغط المهني” و”الصحة النفسية ديال الأطر”؟
-هادشي كاملو غير تساؤلات منا باش نوصلو الرسالة ماشي اتهامات لأي جهة-
اللي واضح، أن “البذلة البيضاء” ماشي غير زي مهني، ولكن رمز ديال مسؤولية.
تخرج بيها للزنقة تتجادل، والناس كتموت فالداخل… راه هادي خيانة للثقة، وإهانة للمهنة، وفضيحة بلا خيط أبيض.
جيني نيشان،
كاين فرق كبير بين خروج طارئ، وخروج مستفز.
راه الشعب صابر على الخدمة اللي ما كتسلكش،
ولكن ماشي غادي يصبر على قلة الحياء فـالعلن.
نيشان الآن