عرف حي المسيرة بمراكش، اليوم، واقعة عنف غريبة بعدما تعرّض واحد من المارّة لاعتداء خطير بحجر كبير، بسبب خلاف بسيط نابع من “الفضول”.
وحسب مصادر من عين المكان، فإن الضحية كان دايز فالشارع وشاف راجل كيقطف الزيتون من شجرة عمومية، فسولو بعفوية على السبب، قبل ما يتحوّل النقاش لمشادّة كلامية حادة، انتهت بضربة حجر قوية فالرّاس تسببات ليه فإصابات بليغة ونزيف دموي.
وفور ما توصّلات عناصر الدائرة الأمنية 11 بالخبر، تنقلت بسرعة لمكان الواقعة وتمكّنت من توقيف المعتدي، فحين تدخلات الوقاية المدنية ونقلت المصاب للمستشفى الجامعي محمد السادس باش يتلقى العلاجات الضرورية.
المشتبه فيه دابا كايتحقّق معاه تحت إشراف النيابة العامة، والبحث مازال جاري باش يتحددو ملابسات هاد الحادث اللي سبابو كان مجرد “فضول في غير محلّو”.
